ភ្នំពេញ៖ រដ្ឋលេខាធិការក្រសួងធនធានទឹកនិងឧតុនិយម លោក ប៊ុន ហ៊ាន បានឱ្យដឹងថាបច្ចុប្បន្នប្រព័ន្ធធារាសាស្ត្រកម្ពុជាអាចស្រោចស្រពផ្ទៃដីកសិកម្មរបស់ពលរដ្ឋបានជិត ២លានហិតា ដែលស្មើនឹងជាង ៦១ភាគរយនៃផ្ទៃដីកសិកម្មសរុបជាង ៣លានហិតា ខណៈលោកមិនអាចបញ្ជាក់បានទេថាតើពេលណាការពង្រីកប្រព័ន្ធធារាសាស្ត្រនេះអាចបំពេញបាន ១០០ភាគរយដល់ពលរដ្ឋ។

ថ្លែងក្នុងសន្នីសិទសារព័ត៌មានអំពីវឌ្ឍនភាពការងាររយៈពេល៥ឆ្នាំ របស់ក្រសួងធនធានទឹក ព្រឹកថ្ងៃព្រហស្បតិ៍ ទី២៥ ខែសីហានេះ លោក ប៊ុន ហ៊ាន បានថ្លែងថា ការដែលមិនអាចបំពេញគ្រប់ផ្ទៃដីកសិកម្មនេះគឺមកពីការពង្រីកផ្ទៃដីកសិកម្មរបស់ពលរដ្ឋមានជារៀងរាល់ឆ្នាំ។

លោកថា៖ «សួរថាពេលណាទើបបម្រើឱ្យអស់? គឺចម្លើយមិនមានទេ។ ដូចលោកប្រធានមន្ទីរខេត្តពោធិ៍សាត់បានលើកឡើងហើយថា ផែនការតែ ១ម៉ឺន ដល់ពេលបំពេញហើយផ្ទៃដីកសិកម្មឡើងដល់ ១១ម៉ឺន៥ពាន់ ដល់ពេលយើងដេញឡើងទៀតថាយើងកំណត់ប៉ុន្មានគឺមិនអាចទេ»។

ជាទិសដៅទៅមុខទៀតដើម្បីធានានូវនិរន្តភាពភាពទឹកសម្រាប់ចែកចាយដល់ពលរដ្ឋ និងជំរុញកំណើនសេដ្ឋកិច្ចជាតិ ដោយគ្រប់គ្រងធនធានទឹកឱ្យបានល្អប្រសើរនៅពេលមានទឹកជំនន់ដោយបន្តអភិវឌ្ឍន៍អាងស្ដុកទឹកនៅតាមទីតាំងសំខាន់ៗដើម្បីរក្សាទឹកទុក បញ្ចៀសនូវជំនន់ និងចែកចាយនារដូវប្រាំង។

គិតមកដល់ពេលនេះក្រសួងធនធានទឹកបានកសាងអាងស្ដុកទុកទឹកបានប្រមាណ ២៥ភាគរយនៃផែនការហើយ ខណៈនៅជាង ៧៥ភាគរយទៀតអាស្រ័យលើទុនវិនិយោគ។

ក្នុងឆ្នាំ២០២១ វិស័យកសិកម្មបានរួមចំណែកប្រមាណ ២៤,៤%នៃផលិតផលសរុបក្នុងស្រុក។ ក្នុងឆ្នាំដដែលនេះកម្ពុជាប្រមូលផលសរុបពីការការដាំដុះស្រូវបានជាង ១២,២១លានតោន លើផ្ទៃដីដាំដុះចំនួន ៣,៥៥លានហិចតា៕ 

^{PHOTO: EAC NEWS}